Entre os Fondos Comunitarios do orzamento da UE revisten un papel moi significativo os denominados recursos estruturais. Estes recursos son os denominados Fondos Estruturais Europeos (FEDER, FSE, FEOGA-orientación e IFOP) e, tamén, o Fondo de Cohesión. Tanto os Fondos Estruturais como o Fondo de Cohesión atenden á finalidade de favorecer un maior grao de cohesión económica e social no espazo comunitario a través do cofinanciamento das políticas de gasto público desenvolvidas polos estados-membros e dirixidas á consecución dese obxectivo. No caso dos Fondos Estruturais Europeos, en virtude do establecido nos artigos 158 e 160 do Tratado da UE, a devandita finalidade perséguese a través de políticas encamiñadas a conseguir un maior equilibrio entre os niveis de desenvolvemento das distintas rexións e territorios que compoñen a Unión, polo que a súa aplicación inscríbese no ámbito da política rexional.
O Fondo de Cohesión, atende, pola súa parte, á finalidade de favorece-lo crecemento económico e a converxencia real dos estados-membros da Unión cun menor nivel de desenvolvemento intentando garantir que o crecemento sexa compatible co mantemento dos seus equilibrios macroeconómicos e orzamentarios fundamentais.
En España, a coordinación da aplicación e xestión dos Fondos Estruturais e do Fondo de Cohesión recae no Ministerio de Economía e Facenda, a través da Dirección Xeral de Fondos Comunitarios da Secretaría Xeral de Orzamentos e Gastos, a cal encádrase na Secretaría de Estado de Facenda e Orzamentos. Entre outras, esta Dirección Xeral ten atribuídas as seguintes competencias e funcións:
- A negociación coa Comisión Europea dos asuntos relacionados cos fondos estruturais europeos, en especial, no que se refire ós obxectivos 1 e 2, así como dos asuntos relativos ó Fondo de Cohesión.
- A coordinación das Administracións territoriais no relativo á programación, seguimento e avaliación dos fondos estruturais comunitarios e do Fondo de Cohesión, así como a coordinación do resto de Departamentos ministeriais responsables da xestión de fondos estruturais.
- A elaboración de estudos e coordinación de avaliacións de programas financiados con fondos estruturais europeos.
- A análise, selección e seguimento dos proxectos que deben ser financiados con cargo ós recursos do Fondo de Cohesión, do Fondo de Compensación Interterritorial e do Fondo de Teruel.
- A proposta dos pagos do Fondo Europeo de Desenvolvemento Rexional e do Fondo de Cohesión ós seus beneficiarios finais.