Directo a: Instituto de Contabilidade e Auditoría de Contas (ICAC)
Que é o ICAC?
O Instituto de Contabilidade e Auditoría de Contas (ICAC) é un organismo autónomo, adscrito ó Ministerio de Economía e Facenda, regulado pola Lei 19/1988 do 12 de xullo de Auditoría de Contas, o Real Decreto 1636/1990 do 20 de decembro que a desenvolve e a Lei 44/2002 do 22 de novembro de Medidas de Reforma do Sistema Financeiro, que modifica varios artigos da Lei 19/1988.
O Instituto de Contabilidade e Auditoría de Contas ten atribuídas as seguintes competencias:
- A realización dos traballos técnicos e proposta do Plano Xeral de Contabilidade adaptado ás Directivas da Comunidade Económica Europea e ás Leis nas que se regulen estas materias, así como a aprobación das adaptacións deste Plano ós distintos sectores da actividade económica e o establecemento dos criterios de desenvolvemento.
- O perfeccionamento e a actualización permanentes da planificación contable e da actividade de auditoría de contas.
- O control e disciplina do exercicio da actividade de auditoría de contas regulada na Lei 19/1988 do 12 de xullo e dos auditores de contas, mediante a realización de controles técnicos e o exercicio da potestade sancionadora.
- O establecemento e mantemento do Rexistro Oficial de Auditores de Contas, a autorización para a súa inscrición nel, a determinación das normas básicas que deberán segui-los exames de aptitude profesional que realicen as corporacións profesionais de dereito público, así como a aprobación das respectivas convocatorias, e o control, vixilancia e custodia das fianzas que se deben constituír.
- A homologación e publicación, no seu caso, das normas técnicas de auditoría, elaboradas polas corporacións de dereito público representativas dos que realicen auditoría de contas así como a elaboración, adaptación ou revisión das mesmas normas no caso de que as devanditas corporacións non procedesen a efectua-la elaboración, adaptación ou revisión.
- A realización e promoción das actividades de investigación, estudio, documentación, difusión e publicación necesarias para o desenvolvemento e perfeccionamento da normalización contable e la actividade de auditoría de contas.
- A coordinación e cooperación técnica en materia contable e de auditoría de contas cos organismos internacionais e, en particular, coa UE, así como cos organismos nacionais, sexan corporacións de dereito público ou asociacións dedicadas á investigación.
- Os órganos reitores do Instituto de Contabilidade e Auditoría de Contas son o Presidente e o Comité Consultor, que contan co apoio da Comisión de auditoría e a Comisión de contabilidade.
O Instituto estrutúrase como sigue:
- Subdirección Xeral de Normalización e Técnica Contable
- Subdirección Xeral de Normas Técnicas de Auditoría
- Subdirección Xeral de Control Técnico
- Secretaría Xeral